DENNIS MOMOTARO NAN MEJIT  Bottom

  • Click HERE to view photo.

    Moktata, ikonan kile, kautiej, im kamolol Anij jemed kin men otemjej. Ibar konan kile, kautiej im lewaj ao nan in yokwe yokwe im karuwainene jen na im family eo ao nan kom aolep Irioj, Leroij, dri tel ro ad ilo kabun, dri utiej ro ilo kien, aolepen armij in
    Marshall Islands elabtata ro jen ailin in Mejit Island, jen drik nan ritto.

    Na, Dennis Momotaro, ij juon ian dri jibadrek ro nan jea eo an armij in Mejit ilo Nitijela eo ad. Ikonan bar kwalok ao nan in kile im kautiej aolep likao ro jet im rej bar einwot jibadrek jea in ad, dri Mejit.

    Elikin enanin 23 year in ao jerbal ilo private sector, ij kile bwe elab ijo konao ie im ij aikuij in baj bok ijo konao nan armij in Marshall im elabtata kom armij in Mejit. Elon kotobar ko ibba im renaj menin kokmanmanlok mour eo ami ro rej jokwe ion Mejit bwe en jokane jen tore in ebed ie, im bar wonmanlok ko nan ailin ne ad. Menin wonmanlok kein renaj bar einwot kamnak kom dri Mejit ro otemjej ijoko jabrewot. Ijoke elane ankilan Anij bwe kom armij in Mejit komin kajijet io ilo jea in ad, inem inaj kate io bwe jibarbar ak mejen kajik kein ren kirmol.

    Tore in, ailin kein ad elab aer aikuiji ro elab kabeel ko ibbeir nan aer jiban dron ilo Nitijela eo einwot ke ej juon tore eo ebin nan kijwoj armij in ailin kein. Kij Dri Mejit jej aikuiji juon moman kaimokran nan an koba lok ibben rein 32 nan aer rejetake dron im bukbukot tok kobban lojen armij in ailin kein im menin wonmanlok ko nan Marshall Islands. Inem elukun in aurok bwe kij armij in Mejit en jejet im jimwe armij eo jenaj kelete.

    Ewor juon website http://communities.msn.com/DennisMomotaronanMejit nan leto letak melele ko ikijen kotobar in ao im nan ami naj bar einwot koman ami kajitok elane enaj wor. Ear koman website in bwe ij kile ke kom dri Mejit ro itulikin Marshall Islands elab an aurok melele im kajitok ko jen kom. Mene kar ta elane kom jako ilo ailin ko ad ak elab an bar aurok melele ko ami. Nan ro im ejelok aer computers nan aer maron drelon ilo website in, address eo ao ebed ijin ilal im ij welcome e aolep kajitok ko im inaj kajeon in uaki jonan wot ao maron. Elab ao tomak ke mene juon wot jea in ak ej adrouij jimor im melele im men otemjej rej aikuij itok jen kom im jab dri kwelok eo wot. KAJUR WOT WOR, ej juon jabon kennan eo elab ao tomak ie bwe elane kijwoj, ejelok, local council, ejelok Nitijela, im labtata EJELOK TOBRAK AK WONMANLOK.

    ANIJ en KEJERAMAN kijwoj im TEL kij bwe ilo ad naj komane KELET ko ad, ren ilo ANEMKWOJ, EJELOK MIJAK, im bwe KELET ko renaj bedbed kin JIMWE, JEJJET, im ilo ejelok KALIJOKLOK. Bar yokwe kom otemjej im kom kanouij in emmol kon ami kar bok ami ien im read ie nan kein ao.

    Ilo Kautiej,
    Dennis Momotaro

    P.O. Box 32 Majuro, Marshall Islands. 96960
    Phones: Office #: (692) 625-3778/3334/4334
    Home #: (692) 247-LOVE
    Cell #: (692) 625-0285
    Fax#: (692) 625-3870
    dennis_mo2@yahoo.com

    [Edited on 9/6/2003 by Drienod]



    [Edited on 9/6/2003 by Drienod]

    [Edited on 26/10/2003 by Drienod]

    [Edited on 26/10/2003 by Drienod]
  • Bar yokwe kom aolep, elabtata Irioj, Leroij, Alab, im aolep kom armij in Mejit.

    Lelok aolep utiej im aibouijuij nan ANIJ jemed, im kamolol E.

    Ij itok wot nan ao bar kameeje lok kar ennan in ao im ear posted ilo allin in kar August, 06 ran eo. Einwot ilo ao kar je ke naij juon eo im elab an tomak ilo jabon kennan in an ritto ro ad, "KAJUR WOT WOR." Jen tore eo nan tore in, ejanin oktak ao lomnak, ej kab kajuurlok lok wot ao tomak ilo jabon kennan in elkin ao roltok jen ailin eo ad, Mejit. Ejamin wor wonmanlok elane ejelok boro kuk. Na ij juon eo im ebirdrodro ao jerbal ibben jabrewot armij im ejelok bere ilo na ke, elane ankilan bwe in jijet, inaj serve e aolep armij in Mejit ilo ejelok kalijoklok, jedron won kwe, jen mone eo ion ak irok. Ejelok ao limotak ibben jabrewot armij ro ilo mone kein im ij jela bwe enaj ejelok ao problem ilo ao naaj jerbal ibben kajojo armij ro ion Mejit, im dri Mejit ro jet ibelakin ailin kein. Ejelok kajitok, problem eo elabtata ion Mejit in rainin, ej kin an armij jab ibben dron.

    Jeraman nan kijwoj aolep im Anij en jiban kij ien otemjej, elabtata ilo naaj kelet ko ad.

    Ilo kautiej kom aolep,

    Dennis Momotaro





    [Edited on 26/10/2003 by Drienod]

  • Yokwe aolep, elabtata dri Mejit otemjej jen drik nan ritto.

    Moktata, lelok aolep aibouijuij, utiej, im kamolol nan Anij jemed.

    Ikonaan wot bar kokaal naan in kautiej im kile ko ao nan kom aolep Irioj, Lerioj, Dri kaki ro ad ilo kabun, kora ro ibbeir, dri utiej ro ad ilo kien, kora ro, kom aolep, elabtata armij in Mejit.

    Elab ao monono in bar kennanik waj kom bwe trip eo ao kein karuo nan Ebeye, im iar komane jidrik kejota im kwelok ibben armij in Mejit ro, ear kanouij in eman. Elab ao monono im kamolol eo ej plan im karok men otemjej nan kij, kinke ijela bwe elane ear jab karok ko an, eban kar eman men otemjej.

    Ikonaan bar kamolol dri Mejit ro ilo jukjuk in bed en ion Ebeye kin aer kar eron kir eo im likit utiej ko aer nan aer itok nan kwelok eo. Naan in kamolol elab nan Dri kaki Kauru Kaios, im dri kaki Phillip jen SDA kin aer kar kejeraman ien kwelok eo. BAr einwot ro im raar letok peir im jiban ilo juon ak ruo wewein.

    Anij en kejeramn kijwoj kajojo, elabtata jiban kij ilo ad jino komane jokelet kein ad ilo National Election in, 2003. Bar yokwe kom aolep im kejbarok wot mour mae tokelik.

    Ilo kautiej kom aolep,

    Dennis Momotaro
  • 0 users
  • and 275 anonymous guests

This list is based on users active over the last 60 minutes.

Majuro: 2013 Pacifc Forum Opening Programs