• YokweOnline
  

  • Registered: Jul 10, 2002
  • Last visit: Mar 31, 2013
  • Posts: 2558

  Posted: Nov 08, 2003 - 11:30 PM

  (Moderator: The following letter is posted by request of Bobby Muller, Candidate for Kwajalein Nitijela Seat.)
  November 4, 2003
  
  Iokwe nan aolep armij in Kwajalein.
  
  Etta in Bobby Muller. Naij juon rijibadok ro nan Nitijela jen aelon in Kwajalein. Mokta jen men otemjej, ikonaan lelok ao nebar im kammolol jemed ilan kin an bar juon alen letok ien in emman nan ad maron konono imejatoto. Ij bar bok ien in nan ao kile im kautej Iroij ro ad ilo Kwajalein, Alap ro, ri-tel ro ilo jukjuk in bed ko ad ilo aelon eo, im elaptata armij ro kajojo rej bok aer ien im ronjake enaan in ao rainin.
  
  Ilo ami woj jela im melele, emoj ao karok lemnak bwe in juon eo im ej jibadok juon iaan jea ko jilu im rebellok an aelon in ad, Kwajalein, nan Nitijela eo an aelon kein ilo ekeleel in ilo November 17, 2003. Ikonaan bok ien in emmon im kajjitok jiban eo ami woj ilo kotobar in nan juon ainikien eo ekaal an Kwajalein ilo Nitijela eo. Kalmenlokjen in ear jab jarjar wot jen kabilok ko an baamle eo ao kab ro nuku im motta im rej jukjuk im amnak ilo Kwajalein im bar bukon ko ilikin, ak ej bar einwot jen ro im rekonaan bwe mour im ejmour en emmonlok ilo aolep armij in Kwajalein, im elaptata nan emmonlok eo an ilju im jeklaj eo an ajiri ro nejid.
  
  Ikonaan kalikar imaan konono in ke jibadok in ao nan juon ian jea ko an Kwajalein ilo Nitijela ej jarjar ilo nememien in ukot boke eo nan aelon eo ao, aelon eo im iar drik im dritoklok ie, aelon eo me ej ao kapijuknen. Ij jibadok einwot juon likao in Kwajalein—ejjab eo me ej bok konaan ilo party im drouluul ko me emoj aer ejaak nan kotobar ko an ro jet. Ejelok kajitok bwe jokdron won eo enaaj jiban Kien eo iolap, kin ijo konaan Kwajalein in nan Kien eo iolap im aelon kein ad, Kien eo iolap ej aikuij in bok konaan nan nai aikuij ko an jukjuk in bed ko ilo Kwajalein. Jimwe eo in jokdron won party eo jeban Kien, im ilo wawen in, ne inaaj juon ian ri-kwelok ro jen Kwajalein, inaaj kate na jonan wot ao maron in lolorjake bwe en tobrak jibarbar im kotobar ko an jukjuk in bed ko ad. Ejjelok kajitok kake bwe jabdrewot jerbal in kotobar ilo jabdrewot wawein renaaj aikuij kalmenlokjen ko rejimwe im kijejeto ko an aolep
  
  Ilo kilaan etta burro im jitibon jerbal ibben dron, ikonaan kwalok ke ewor kijejeto im kabeel ko me ij tomak inaaj maron jiban aelon in ad kin jibarbar im kotobar ko rejelet mour im ejmour an aolep armij. Ij bareinwot tomak bwe emoj ao tobar jonok in kalmenlokjen im jonan iminene eo ilo jerbal in kien bwe in maron kile ibba make bwe inaaj kate io im beran im mol ilo ao konono im nai ainikien armij ro ad, jerbal in jimwe im karejar, im elaptata nan komaat jona bukot mejlan abban ko im rej drebij an wonmaanlok im bolamen jukjuk in bed ko ad ilo Kwajalein.
  
  Ij kile im kautej kir eo an aolep armij in Kwajalein bwe ri-kwelok ro ad nan Kien eo iolap ren jerbal im burokuk ibben dron, ibben ri-tel ro ad ilo manit, elaptata Iroij im Alap ro ad, ri-tol ilo kabun, ilo kien eo ad make, im bareinwot ro me rej bokkonaer ilo jukjuk in bed eo. Ejelok kajitok bwe ej wawein eo drein nan maron madmode im kebeloke juon wonmaanlok eo ejejjet im ebolamen nan aolep. Ij kalimur bwe enaaj jekjek eo in im inaaj kommani jerbal ko ao einwot juon ami ri-kwelok ilo Nitijela eo ad.
  
  Ikonaan kio bok jidrik ien nan ao kamelele ki jibarbar im kotobar ko ne inaaj jijet iloan Nitijela. Jerbal eo imman ej nan lolorjake bwe en jejjet an Kien eo iolap nai aikuj ko an jukjuk in bed ko ad ilo Kwajalein. Ilo wawein in, ij konaan kin kojemoj in jaan ko an Kien jen budget eo elap me ej bok koban jen ewoj ko an armij, jaan in jiban ko jen Kien an America im bareinwot kien ko jet jej jemjera ibbeir, im bar program in jiban jen drolul ko jet. Ejjap kin ke ikonaan kejokdroon jiban ko re aurok an Kien eo ak ilo ad kalimjok lok budget eo an iio in me ekaal, ewor wot jonan ne $15.8 million ear kojemoj nan jerbal im program ko an Kien ilo Kwajalein. Tarin jonane ej 20% in aolep kojemoj ko iumin budget eo elap. Ilo ad etale jaan ko rej walok jen Kwajalein, koba jen ko rekaal iumin Compact eo nan aikuij ko an jukjuk in bed an Ebeye, ewor lok $20.6 million ej jelet e Kwajalein. Jonan in ej kebaak lok 25% in aolep budget an Kien. Ij tomak bwe jonak eo in ejimmwe im ejejjet bwe ewor tarin 25% in armij in Majol rej jukjuk im amnak ilo Kwajalein, elaptata ro me rej make wot lon ilo jikin jerbal ijelokin ri-Kien ro—ilo wawein in ij konaan kin ri-jerbal in Majol ro ilo jikin jerbal ko an Army. Ne jej bar antoon e ijo konaan Kwajalein nan lal in ad ikijen economy eo ad ak kobban lojen aelon kein, tarin 25% ej walok jen Kwajalein. Ij tomak emoj an Kien eo ad kile wawein in bwe ne jej lale lok kojemoj ko jen yio 2000, ear laplok jen yio ko imaan botaab ej alikar wot ke ej wor wot dremillok ko me rej komman bwe en jab bolamen kotobar ko ad, elaptata nan kokomanman lok jikin jikuul im jelalokijen ko, jikin ejmour ko, im bar jerbal ko jet an Kien nan jukjukinbed ko ad.
  
  Wunlep in kotobar in nan komman bwe en jejjet ijo konaan Kien nan armij einwot an kape jen Jemenei eo ad, elaptata ilo jerbal ko rejelet jelalokijen nan ajiri ro nejid. Ij kile ibba bwe menin—jelalokijen-- ej pedped eo enaaj kobooj iliju eo an ro nejid bwe en maron eddok lok lal in ad ilo joun wawein eo ebolamen. Ej ajiri ro nejid eo im renaaj jurake iliju eo an aelon kein, im elaptata ej er eo im renaaj kejbarok mour im manit ko ad eo im Anij ear kejelet kij kake. Rainin ion Ebeye, ewor tarin 30% in ajiri ro 6-16 yio rej jab bed iloan imon jikuul. Nan jonan jukjuk in bed eo me ewor loninlok wot 50% reddik jen 16 yio, ejelok kajitok bwe aolep rej aikuij in bokonaer katok im kokajuur jikin school ko ad bwe en bobrae an nej jerata ilju eo an ajiri rein nejid.
  
  Inaaj bar einwot kate io jonan wot ao maron nan lolorjake jerbal ko rellap im rebbar immad, elaptata ko im rejelet jikin ejmour eo ad woj, jerbal ko im rejelet mour an armij ikijen dren, jarom, jerbal ko im rejelet jikin jokwe in ekkal ko nan kokomanman lok jukjuk in bed ko ad ilo Kwajalein. Ejjelok kajitok kake bwe kotobar eo juon im elap an aurok ej nan kokomanmanlok im kabidodo wawein ad jerbal ibben jikin jerbal eo an Army ilo ion Kwajalein bwe en emman lok kojeien aolep armij ro ad im ro rej bar bok aer mour jen jerbal kein re aurok.
  
  Eliktata ak ejjab driktata, ikonaan bok ien im lukkun kameej ke na im baamle eo ao rej bar itok jen iloan ailin eo Mid-Corridor eo. Ilo wawein in, ij katemene bwe inaaj nae ainikien armij in Mid-Corridor ro ilo kotobar eo bwe en emmanlok kojeien armij ro ad ilo aer jukjuk im amnak ion Ebeye ilo tore kein me jejjap maron rol nan ene ko raar komakit koj jeni. Ilo wawein in, ij tomak ke emoj an wor bunton ko iumin Compact eo nan kojerbal jet jaan ko nan nae aikuij ko an armij ro Kien eo an America ej kojerbal bwirej ko aer, elaptata armij ro raar komakiti jen ene ko eneir. Emoj an lajrak bwe jaan in me ewor tarin $1.9 million emaron jerbal nan ekkal imon armij, nan kabwe aikuij in jikuul im takto, im bar nan aikuij ko jet me rej jelet mour. Ij rejan Kien eo iolap, ri-tel ro ad ilo KADA im bareinwot KALGOV, bwe en jino konono im komman karok im elemwakot ko bwe en maron jijet kitien kejerbal jaan nan aikuij ko an armij in Kwajalein. Ilo ad antoone, jekdron ne ejjab lon juon LUA eo ekaal nan kaetoklok kwon eo ilo MOURA eo jen 2016, emoj an alikkar ke jaan in tarin $1.9 million emaron jerbal nan aikuij ko make an armij ro aer Kwajalein, elaptata ro me emoj aer komakiti jen joko jikier.
  
  Ij kejatdrikdrik bwe enaan kein renaaj jiban kommane juon kelet eo enaaj jimwe im jejjet nan iliju eo an aelon in Kwajalein. Elane elon jabdrewot melele en konaaj aikuji ikijien kotobar in, inaaj monono in eron jabdrewot ilo jabdrewot wawein. Ak ne ejjab, jouij im e-mail eo ilo [email=BobbyMuller2003@aol.com ]BobbyMuller2003@aol.com [/email]ak ne ejjab, etal nan www.BobbyMuller2003.org nan melele ko rerebakbak lok.
  
  Kommol kin ami letok jidrik ien ko ami re aurok nan ao karon kom woj kajojo kin jibarok in ao ilo ekaleel in immad. Eliktata, ij kile bwe maron eo nan jurake jibadbad im kotobar in ej bed ibbam ie armij in Kwajalein. Bar juon alen Anij en kejeramon kej woj kajojo im aelon in ad.
  
  Ilo wot kautej,
  
  Na Bobby Muller, Rijibarok jen Kwajalein
  
  
  --'Etoran Madmod' The Future of Kwajalein
  Vote Bobby Muller, Nitijela 2003
  
  
  [Edited on 11/10/03 by YokweOnline]
  
  [Edited on 11/11/03 by YokweOnline]

  • 
  •  
• wut_lomar
  

  • Registered: Mar 21, 2003
  • Last visit: Mar 28, 2005
  • Posts: 40

  Posted: Nov 09, 2003 - 01:25 PM

  BOBBY
  
  ETORAN MADMOD......KWON BUUL IM ETTOR BWE KEM (RI -KWAJALEIN) NAAJ ETOR ILOKOMWAJ.
  
  kautiej wot
  
  jron in Kwajalein

  • 
  •  
•  
•  

Users on-line

• 0 users
• and 72 anonymous guests

This list is based on users active over the last 60 minutes.