Ikonan kio kile im kautiej rein mottad im rej kobatok ibed rainin jen aelon ko jet rebake kij ilo woden bwil kein bareniwot lal ko jet. Honorable Speaker Kamuta Latasi jen Tuvalu, H.E. Ambassador Omar Metwally and Mrs. Metwally jen lal eo Egypt.

Mokta jen ao jino nan in non ao kwalok jet melele ikijen aurok eo an rainin einwot ad kemem-e Jemen-Ei in ad, ikonan mokta lelok ilo etan Kien eo im armij ro ad ilo Aelon Kein, ao naan in kile im nebar non ri tel ro jemen im jinen aelon kein, ro im jet iaier rar jab iuan Constitutional Convention eo moktata einwot jet delegate ro wot, ak rar bareinwot ilo maron im jimwe ko aer make jet dri tel ilo Manit jen kajojo aelon im ene ko ilo belakin Majol in.  Rar maron in lonaj lentak jekjek im kilen kenono im bebe iben dron ekoba iakwelel ilo kar ConCon eo kein kajuon im ilo air kar jela im lukkun melele kin mour im manit in Aelon Kein.  Ilon in men kein otemjej, rar kwalok air beran im lole ilo air kar jino ejake unjen im bedbed eo bwe en jutak lal in ad rainin.

 May 1  ej juon ran  eo im elab an aurok non Republic eo an Marshall Islands einwot ke ej ran in Kemem eo ilo yio otemjej  non Jemen-Ei eo ad im ekar komon bwe en lotak Republic in im erom juon Kien eo ej Kien e make.  Ej monakjen in jerbal eo in im ekar nakitien bwe en ejak kien ilo Aelon Kein.  Jemen-Ei in ej 33 yio drettan rainin im kin menin ej juon menin an utiej buruo im likun monono bwe in bok ien in emon, elab, im aurok im lewaj jen tumwilal in buruo kamolol im kamolol im kejeramon ko non kijwoj armij in Aelon Kein im ij bar kamolol armij ro jet im emoj air kelet bwe Republic in ej ijo im rej jukjuk im amnak ie ijelokin kabijuknen ko air makmake.  Komwoj aolep im emol kin jiban kein ami non jeramon im edreklok eo an Marshall Islands.

 Ilo jitibon monono eo an rainin, jouj im kobatok iba ilo adwoj kile im nebar jerbal in kijejeto ko relab an aolep armij rein ad ilo Aelon Kein ilo air kar jiban kalek im ejake mantak Republic in ad iloan yio kein 33 rej motlok rainin.  Kobatok iba ilo adwoj kejeklokjen ibendon im kakemejmej armij ro aolep mottad im rar jiban im komon bwe jen juon wot iben dron im edreklok.  33 yio ko remotlok armij in Majol rar jino juon emakit eo ekal einwot juon lol eo ej anemkoj einwot an alikar ilo naan im etonak ko an late President Amata Kabua im ro jet jemen im jinen Aelon Kein kab Dri tel ro ad ilo manit.

 Ekar juon menin koketak io iumin yio kein mantak einwot juon dri Majol ilo ao kar loe im jela ke mene jar maron in tobar mejenkajik eo bwe jen kiene kij make, ak ekar jab juon wewen eo ekar bidodo einwot ke ear aikuij wor jet men ko jar maron karmijete kij kaki.

Ilo ad emakit manlok iben dron ion wa in wan Aelon Kein, im ilo ad kajeon ion im ella ion elon menin aban ko im einwot ad reiliklok im loe tobrak ko rar walok im ilo remanlok im jela im ejake ke jenaj jelmae elon men ko rebin ilo ran im yio kane rej bedotok,  Ij kajitok bwe jen kile im anek wot jenkwan ne ko neen dri tel ro ad ilo Manit eo im Kien kin lole im kijejeto ko air einwot air kar ajelok im kematlok air bwe jen maron in bed ijin rainin.

 Ij jutak ije im reilok im kalimjek flag eo ad ilo an ejobelbel ijin ilon ilo an aubuijuij, ekomon bwe en jiktok juon lomnak emwilal im ekajur ilo buruo bwe en wor juon Marshall Islands eo im ekajur im ewor jitibon yokwe im iben dron ie.  Juon Marshall Islands eo ewor an kajojo armij maron im anmekoj non kwalok lomnak ko aer ie. Juon Marshall Islands eo enaj bareinwot ejelok aban im kolaburbur non aer kojerbal jela im kapeel ko aer ie non jonako ko ilontata. Juon Marshall Islands eo ejamin wor armij ak Ailing ak enne ie eban bok an ajinkij ilo ial in wonmanlok im eddoklok ko ie. Im eliktata juon Marshall Islands eo kajojo armij ilo aer bed im mour enaj wor aer tomak im jela ke ewor aer aurok im bareinwot jela like er make, mour ilo wawen ko roman im jejet, im mour kin buruon kejatdrikdrik. Im kin wawen kein, enaj itok juon jitibon utiej buru non an kajojo iar ba, “Na Ri Marrshall” Juon eo ej mour iben lal ko im armij ro rebake kij ilo aeniman im bareinwot iben lal ko relab im bok kunan ilo dolulul eo elab an lal in, United Nations. Jibadbad im kotobar ko iar konono kaki ke iar jino bok office rej wonmanlok wot einwot menin kotobar ko an Kien in ami.

Rainin ilo ao erreliklok imaron in ba ke emoj ad emakit manlok jen ijo jar bed ie mokta ilo jerbal kein ad. Emaron kar wor rumij ilo ad emakit im emaron kar wor ebedid ilo ial in ad manwaj. Emaron wor ien jej bun im okjak, ak en ejelok bere ke Kien in ej ejamin oktak an lomnak im bwe enaj bin wot em dim ilo an kotobar bwe ej jerbal ilo wawen ko renaj boklonlok jokun mour ilo Ailin kein ad. Elab adwoj jela kke ial in ad manwaj non ad wawa ion kotobar kein ad eaitok im ju. Jaikuj kate kij, im bar kate kij, im likun kate kij bwe jibadbad kein kin jelelokijen, ejmour, jeraman, im monono ren tobrak.

 Jej bar tomak kke kien anemkoj ejelok melelen non ro rejab bok aer ejinkij ilo menin jeraman im menin wonwanlok ko. Ilo yio ko 33 rej motlok jar lo bwe elon ro kin mour in kate kab kijetoto rar maron tobar ijok lok ilon ilo jokun mour. Kien in ami ej jutak bin ilo lomnak in ke aoleb wawen ko non jiban jabdrewot armij bwe ren wonmanlok im wanlonlok ilo jelelokijen, jeraman im jokun mour ren koman.

 Ilo ien in kio ibar konan juon alen kile im kamolol ilo etan armij in Marshall eo ej Jemen lal in Ad late President Iroijlaplap Amata Kabua kin kate im lo emon ko an. Im ejja ilo wawen in wot ibar konan kile im kamolol First Lady Lejla Emlain Kabua kin ijoko konan. Ikonan bar lelok adwoj kile im kamolol former President Iroijlaplap Imata Jabro Kabua im First Lady Lejla Hiromi Kabua, former Kessai H. Note kab First Lady Mary Note. Former President Iroij Litokwa Tomeing im First Lady Lejla Arlin Tomeing, kab former President Iroijlaplap Jurelang Zedkaia im First Lady Lejla Hannah Zedkaia. Kamol elab kin jerbal im ijoko komr komani non Ailin kein. Jinok ko ami roban jenak jen lomnak ko an Ri Ailin kein.

 Aet, Republic in ad ej kamolol bwe elon ro mottan jen elon jikin ko rebak im ko retollok rej lettok jiban ilo elon kain wawen ko. Lelok ad kamolol non Kien eo an United States, Kien eo an ROC Taiwan, Kien eo an Japan, Kien ko an Australia im New Zealand, Pacific Islands Forum, Secretariat of the Pacific Community, dolul ko jet ilo region in, United Nations, European Union, Asian Development Bank, International Monetary Fund im World Bank im bar ko jet.

 Mokta jen ao kejemlok naan in ao ikonan bok jidik konao ilo unin tel in an rainin: TILMEN EOWJ. Ilo ao ronjake melele ko kin naan in im bareinwot ilo ao kolmanlokjen kake bolen imaron in ba ke naan in ej kwalok kadkadin juon armij eo etilijok ilo an aini im kejbarok kein jerbal ko an non aer bojak im jerbal jabdrewot ien. Juon eo ejab jerwan im ejab kijen meleleiki men ko raurok im wor tokjaer non jerbal im mour. Ilo ad kejerbal nann in ekka wot ad lomnak im konono kin kein jerbal ko einwot kein raro ko, kein kob ko, kein kwainini ko, kein eonod ko im bar men ko jet ekka ad kejerbal peid kaki im jej loi kin mejad. Ak elane jelikun ketal ad lomnak jemaron in ba ke aolep wawen ko rej koman bwe en bidodo ad mour ibendon kaki ak jela mour ibendon kaki rej bar tool im jaikuj bwe jen bar tilmen eowoj kaki. Nan wonjonak, jemaron in ba ke jela karejar, jela nae, jouj, im wawen ko jet rej koman bwe jen maron mour iben don rej bar tool ak ein jerbal ko non boj im dabij kij ibendon. Jemaron in bar ba ke jela ko ad im kapeel ko ad rej bar tool non kij ilo ad bikot ad mour im bareinwot ilo ad jerbal ibendon. Kin menin jen tilmen eowoj kin men kein.

 Eliktata ikonan bar lewaj kamolol non aolep ilo ami kar kobatok kejouij celebrate i rainin ibendon. Ij lo eobrak turin capitol in im ijela ke koj woj aolep jej elewetak ilo rainin an Jemen-Ei in ad. Ilo etan Cabinet eo, Eta make im Lieom im family eo amro, ij lewaj nan in jeraman ilo rainin. Jeraman non aolep ri Marshall ilo Marshall in im likin Marshall in.

Kom Emmol
-- 33rd Constitution Day Commemorative Address by His Excellency President Christopher J. Loeak

Print